Iristear dira egutegian gorriz markatutako lau egunak, Goizuetan. Gorriz, paper txuriaren gainean, Mozorroak bezalaxe. Igandean hasiko dira Inauteriak herrian, eta horrekin batera, baita prozesio txuri-gorria ere.
Gaztetxoak izanen dira herriari kolore bereizgarriak ematen aurrenekoak, igande arratsaldean Zahagi Dantza eskainita. Eta elkarrekin afalduta bilduko dituzte indarrak Mozorroek, hurrengo bi egunetarako: baserriz baserri ibiliko dira astelehenean, eta herriko etxeetan barrena asteartean.
Bitartean, Inauterietan ohikoak diren beste mozorro batzuekin beteko da herria astelehenean. Izan ere, Kaldereroak dira aurtengo gaia, eta eguerdi partean eginen dute kalejira, herrian zehar. Ohi bezala, astearte arratsaldean izanen da Zahagi Dantza, Motzanetik hasita. Ohikoak izanen dira bazkari-afariak, noski; eta musikarik ere ez da faltako, Garazi eta Gorkaren eskutik zein Malkogarriyak taldearekin.
Kontuen Egunarekin jarriko diete errematea hurrengo larunbatean, otsailaren 25ean. Hutsik egin gabe, Igandea txarangak girotuko ditu poteoa eta arratsaldea, eta azkeneko bazkaria eginen dute Mozorroek.
GOIZUETAKO INAUTERIEN EGITARAUA
OTSAILAK 19, igandea
17:00, Gaztetxoen Zahagi Dantza
18:30-21:00, Musika: Garazi eta Gorka, ikastolan
21:30, Mozorroen afaria
OTSAILAK 20, astelehena
08:00, Mozorroen abiera baserrietara
10:00, Plaza apainketa. Gaia: Kaldereroak
11:30, Kalejira herrian zehar
13:30, Bazkaria
16:30, Haur eta gaztetxoentzat entretenimendua
18:00, Txokolatada
18:30, Musika: Garazi eta Gorka, ikastolan
Ilunabarrean, Mozorren etorrera, dultzaineroekin
22:00, Mozorroen afaria
OTSAILAK 21, asteartea
09:00, Mozorroen gosaria
10:00, Mozorroen irteera, herriko etxeetara
14:30, Mozorroen bazkaria
17:30, Zahagi Dantza, Motzanetik hasita
18:30, Malkogarriyak musika taldea, ikastolan
22:00, Mozorroen afaria
OTSAILAK 25, Kontuen Eguna
13:00, Poteoa, Igandea txarangarekin
14:30, Mozorroen bazkaria
17:30, Igandea txaranga, herrian zehar