Arrain saltzaile berria izanen du Goizuetak ere, aurrerantzean. Hain justu, Ereñotzura eta Aranora arraina eramaten duen berbera izanen da, Goizuetara ere etorriko dena: Karlos De Las Heras. Asteazkenetan eginen du herrira bisita, eta ohiko lekuetatik pasatzeaz gain, plazan egonen da eguerdiko 12:00etatik 12:30etara bitartean.
Donostian daukate arrandegia Karlos De Las Heras eta Amaia Etxeberria astigartarrek, eta bertatik eginen dute banaketa, Urumea bailarako goiko herrietara. Asteazkenean pasako dira hiru herrietatik: goizeko 10:30ak eta 11:00ak artean izanen da Ereñotzun, aurrena; Aranora igoko da ondoren; eta 12:00etarako iritsiko da Goizuetara, azkenik.
Arraina eramanen du Karlosek bere kamioian, baina norbaitek aurretik enkargatu nahi badu arraina, telefonoz deitu dezake, bi zenbaki hauetako batera: 605 703 038 (Amaia) edo 689 083 870 (Karlos).
Orain arte, Juan Elizalde eratsundarra etortzen zen bailarara, herriz herri arraina saltzera. Baina erretiroa hartu zuen aurreko urtearen bukaera aldera, eta bi astigartarrek hartu diote erreleboa orain. Ereñotzura eta Aranora, duela aste batzuetatik egin du bisita Karlos De Las Herasek, asteazkenero. Eta hemendik aurrera, Goizuetara ere iritsiko da arrain saltzaile berria, hutsik egin gabe.