Zirkuaz gozatzeko aukera izanen dute goizuetarrek, datorren larunbatean, udaletxeko ganbaran. Ikuskizuna eskainiko du bertan Ekain Ibargurenek, Gure Zirkuko pailazo ezagunak. Arratsaldeko 18:00etan izanen da.
Pailazo, malabarista eta aktore azpeitiar gaztea herriz herri dabil, bere bakarkako ikuskizunarekin: Aho bete hortz. Eta oraingoan, Goizuetara eginen du bisita, emanaldi «dibertigarri eta eroa» eskaintzeko.
Pailazo izateak «txikitatik» erakarri du Ekain Ibarguren: «Pailazoz mozorrotzen nintzen inauterietan, eta eskolako antzezlanetan pailazoarena egiten nuen beti». 14-15 urterekin, pailazo talde bat sortu zuen lau lagunekin. Gure Zirkuan dabil orain, duela bost urte martxan jarri zenetik.