Heltzear da goizuetarrentzat hain berezia den eguna: Feri Eguna. Etzi ospatuko da 18garren edizioa, eta goizetik eguerdira arte jarriko diren postuez gain, entretenitzeko makina bat ekintza ere antolatu ditu Feria Batzordeak. Goizeko 10:00etatik aurrera egonen dira aziendak eta postuak herriko hainbat txokotan. Eta goizean zehar, joaldunak eta trikitilariak ibiliko dira herriko kaleetan barrena, goizuetarrak dantzan jarriz. Eguerdiko 12:00etan, berriz, toka txapelketa jokatuko dute, Goizuetako eskolan. Giro ederra izanen da herrian, eta baserritarrez janzteko gonbitea luzatu die Feria Batzordeak denei.
Ondoren, 14:30etan, ohiko bazkariaren bueltan bilduko dira herritarrak, eta menu ederra jateko aukera izanen dute aurten ere: bertako babarrunak, betizu gixatua eta postrea. Bazkarirako txartelak, atzo arte erosi zitezkeen Amaia Kafetegian eta Estankoan, Feria Batzordeak jakinarazi zuenez.