Iristear da urteko egun berezienetako bat, goizuetarrentzat: datorren larunbatean ospatuko dute Feri Eguna. 18garren edizioa izanen du azienda, artisau eta nekazal feriak, eta 10:00etatik aurrera egonen dira aziendak eta postuak, herriko kale eta plazetan. Girorik ez da faltako, joaldunak eta trikitilariak ere ibiliko baitira herria alaitzen, goizean zehar. Eta hori guztia borobiltzeko, baserritarrez jantzita joateko deia egin du Feria Batzordeak.
Eguerdian, gainera, toka txapelketa jokatuko dute eskolan. Eta bazkalorduan, ez du hutsik eginen Feri Eguneko bazkari klasikoak. 14:30etan izanen da, eta menu ederra prestatu dute: bertako babarrunak, betizu gisatua eta postrea.
Bazkarirako txartelak asteazkenera arte salgai, Amaian eta Estankoan
Bazkarirako txartelak, asteazkenera arte egonen dira salgai, Amaia kafetegian eta Estankoan. Helduenak 22 euro dira, ikasle eta langabetuenak 18 euro, eta 9-16 urte bitarteko gaztetxoenak 11 euro. 8 urtetik beherakoentzat, berriz, doakoa izanen da.