Ostiralean jokatu zituzten Umore Ona Txapelketako finalak, bost kategoriatan; eta 10 txapeletatik zazpi geratu ziren Urumea bailaran: sei goizuetar eta astigartar bat izan ziren garaile.
Sein mailan, Jon Larin eta Luken Elizegi goizuetarrak 18-3 nagusitu ziren, Mañel Seges eta Beñat Narbarte herrikideen kontra. Kimuetan, Eñaut Aranberri eta Axel Salaberria goizuetarrak izan ziren txapeldun, Alize Sagardui herrikideari eta Larraungo Lekuonari irabazita (18-8). Haurretan, Joseba Arretxe eta Oinatz Gaskon hernaniarrek ezin izan zuten, Aurrerako Martinezen eta Alkortaren kontra (18-3). Kadeteetan lortu zuen txapela Xuban Goñi astigartarrak, Larraungo Sotilekin, Añorgako Arruti eta Gaztelekuko Segurola menderatuta (22-6). Eta nagusietan, garaipen ederra lortu zuten Beñat Apezetxea eta Antton Apezetxea goizuetarrek, Aurrerako Txoperena eta Epleko Odriozola menderatuta (22-14).
Final horien aurretik, ostegunean, nesken lagunarteko finala ere jokatu zuten: Ainhoa Zabaletak eta Maria Eskuderok irabazi zuten, Irati Arozenaren eta Mayi Zelarainen kontra (22-10).
