Hodei Lujanbiok bigarren postua lortu zuen modalitate luzean, Goizutrail lasterketan

Hodei Lujanbio goizuetarrak 2. postuan amaitu zuen 25 km-ko lasterketa.

Joseba Larralde eta Itxaro Zabaleta 25 km-koan, Eki Imaz eta Olatz Azpiroz 10 km-koan, eta Olatz Zabala eta Ion Altzuri errelebotan, izan ziren lehenak, helmugara iristen. Bi distantzia eta hiru modalitatek osatu zuten lasterketa.

Joan den larunbatean, goizeko 09:00etan, eman zitzaion hasiera Goizutrail lasterketari. Bero haundiari egin zioten aurre partehartzaile eta ikusleek. Aurreko urteetan bezalaxe, korrikalariek hiru modalitatetan parte hartzeko aukera izan zuten: bata, luzea, 25 kilometrokoa; bestea, motza, 10,6 kilometrokoa; eta azkena, 25 kilometrokoa, erreleboka egitekoa. Azken kasu horretan, lehenengo parte-hartzaileak 10 kilometro egin zituen eta bigarrenak, berriz, 15 kilometro. 

Lasterketa plazan hasi zen, eta korrikalariek Eneko Elorri aldera jo behar izan zuten, lehenik. Ondoren, Aitasemegi auzora igo ziren xenda estu batetik eta, lau kilometrotan, xenda eta pistetatik 680 metrotara dagoen Eneko Elorriko bizkarrera igo ziren. Handik bueltan, herrira jaitsi ziren Espideko sorotik, eta Plazan bukatu zuten, ibilbide laburra hautatu zutenek. Binaka aritu zirenek, berriz, erreleboa eman behar zioten lagunari, eta Mandoegirako (1.045 metro) bidea hartu. Jaitsiera egin ostean, plazan amaitu zuten ibilbidea.

Hauexek izan ziren azkarrenak, hiru modalitatetan: Joseba Larralde eta Itxaro Zabaleta, 25 kilometrokoan; Eki Imaz eta Guratz Azpiroz, 10 kilometrokoan; Olatz Zabala eta Ion Alzuri, 25 kilometrokoan, erreleboka. Hodei Lujanbio goizuetarrak, podiuma egin zuen lasterketan, joan den igandean Ereñotzun garaipena lortu ostean. Bigarren heldu zen helmugara, 25 km-koan. 

 

Bero haundia izan zen

Goiz eguzkitsua, bero haundikoa, pasa behar izan zuten korrikalariek. Termometroa 30 gradutara iritsi zen, eta beroari aurre egiten laguntzeko asmoz, lasterketan zehar edateko eta jateko puntuak ere ezarri zituzten. Gainera, helmugara iristen ari ziren korrikalariak mangera baten busti zituzten herritarrek, gorputza freskatzeko.


Sailkapenak:

25 kilometroko lasterketa

10 kilometroko lasterketa

25 kilometroko lasterketa, erreleboka

Erlazionatuak

Goizutrail 2022

Goizueta

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!