Bi urteko etenaldi luze baten ostean, bueltan dira Goizuetako Txino auzoko festak. Bihartik larunbatera arte, jai giroan murgilduta kolorez betetako asteburu ederra pasako dute auzotarrek. Txino auzoko festak ospatzekoak ez baziren ere, antolatzaileetako batek, aditzera eman du herensugearen sua bezala berotu zirela: «pasa den astean, erabaki genuen festak antolatu eta aurrera eramatea, bapateko erabakia izan zen. Dudetan geunden, baina berotu egin ginen, eta Txino auzoko jaiak ospatuko ditugu, gogoz».
Bihar gaueko mus txapelketarekin emanen zaie hasiera festei, eta horretarako hitzordua 22:00etan jarri dute, Zubiondon. Etzi, txupinazoen eztandek esnatuko dute herria, eguerdiko 12:00ak aldera. Arratsaldeko 19:00etan, berriz, Unai Agirre hernaniarrak eta Xabier Legarreta aranoarrak jarritako errimek, erritmo bizian jarriko dute Txino auzoa. Jarraian, gaueko 21:00ak aldera, afari baten bueltan bilduko dira, eta afariarekin antolatutako ekitaldiak amaitutzat emanen badira ere, seguru igandera arte iraunen duela jai giroak.
Antolatzaileek, nabarmendu dute larunbateko afarira joateko intentzioa duenak, aurrez telefono honetara deitu behar duela (645 307 272), eta izena eman.
