Primerako lehiaketa, eta saria denentzat

Arratsalde polita izan zen ostiralekoa, Goizuetako udaletxeko ganbaran: Katarrapikaka-ttiki lehiaketa egin zuten, Xalto eskolako ikasleekin. Lau talde aritu ziren jokoan, eta ederki moldatu ziren, Goizuetari buruzko 10 probekin: galderak, esaera zaharrak, herriko hitzak, auzoen eta etxeen izenak... Oso estua izan zen azkeneko puntuazioa, eta talde onenaren (45 puntu) eta azkenaren (40,5 puntu) artean apenas izan zen alderik. Talde irabazleak erabaki du zertarako erabili 450 euroko saria, baina talde guztiek gozatuko dute horretaz. Lehiaketaz ederki gozatu zuten, aretoa bete zuten herritarrek ere. Agortu egin ziren sarrerak.