Abenduko kultur ekintzen barruan, hitzaldia eskainiko du gaur Eñaut Agirre filologo hernaniarrak, Urumea bailarako natur eta ahozko ondareari buruz. Goizuetako udaletxeko ganbaran izanen da, arratsaldeko 18:30etan. Iñaki Sanz-Azkue biologoa ere bertaratzekoa zen, baina ezinen du joan azkenean.
Zehazki, ornodunak izanen dira hizpide saioan, oinarri hartuko baitute irailean argitaratu zuten liburua: Gure faunari eta florari begira bildumaren aurrenekoa, ornodunei eskainitakoa; anfibioak, arrainak, narrastiak, hegaztiak eta ugaztunak. Laster argitaratuko dute bigarrena, zomorroei eta landareei buruzkoa.
Liburua eskuratzeko aukera izanen da hitzaldian bertan, eta bestela, Dobera Euskara Elkartearen bulegoan (Hernanin, Larramendi kalea 11, behea) ere eskuragarri dago, besteak beste.