Negu hotzaren hasiera berotzeko, hiru hitzordu jarri dituzte abenduko kultur agendaren barruan, Gabonen aurretik. Gaur bertan izanen da aurrenekoa, eta umoretik joko dute, Ainhoa Ruizek eskainiko duen bakarrizketarekin: Txapeldun bihotza.
Goizuetako udaletxeko ganbaran izanen da saioa, arratsaldeko 18:00etan hasita, gazte eta helduentzat. Bakarrizketak azaleratu nahi du, asko dagoela egiteko berdintasunaren aldeko borrokan, eta maitasun erromantikoaren mitoak aztertuko ditu: laranja erdiarena, minarena, esklusibotasuna... Bere bizitzaren ibilbidea eginen du protagonistak, boxeo ring batean sartuta: «barrez eta konplizitatez KO utziko gaitu laugarren roundean», aurreratu dute. Maite Redin da bakarrizketaren egilea eta zuzendaria, eta Ainhoa Ruizek interpretatuko du, ordubete inguruko saioan.
Datorren ostiralean izanen du bigarren hitzordua, abenduko agendak: Gure faunari eta florari begira liburuaren aurkezpena eginen dute Eñaut Agirre eta Iñaki Sanz-Azkue egileek. arratsaldeko 18:30etan izanen da, udaletxeko ganbaran hori ere. Irailean argitaratu zuten liburua, Doberaren eskutik, Urumea bailarako natura eta ahozko ondarea bilduta.
Eta kultur agendako hirugarren eta azken saioa, abenduaren 13an izanen da: Sukaldatu, zuk aldatu hitzaldia eskainiko du Itxaro Zabaletak, familian elikadura osasuntsua lantzeari buruz. Arratsaldeko 18:00etan izanen da, ganbaran; eta izena eman behar da aldez aurretik: Xalto eskolan, edo 948 51 07 19 telefonora deituta.