Indarkeria Matxistaren Aurkako Nazioarteko Egunaren bueltan, Zauria(k) dokumentala proiektatuko dute gaur, udaletxeko ganbaran, arratsaldeko 18:00etan hasita. Joan den asteazkenean, Emaginen eskutik, Zer eragin dauka gure herrian? hitzaldia izan zuten eskolako jangelan.
Gaurkoan, berriz, eromena, gaizkiegonak eta osasun mentala ikuspegi feminista batetik lantzen duen dokumentala proiektatuko dute, eta sufrimendu psikosoziala zein genero bizipenak uztartzen dituen 9 emakumeren errealitateak azaleratuko dira.
Azaroaren 25ean, jarraipena
Ostegunean, Indarkeria Matxistaren Aurkako Nazioarteko Egunean, Goizuetako Emakume Taldeak antolatuta kalejira eginen dute herrian. Arratsaldeko 18:30etan emanen diote hasiera, herritik plazaraino.
Indarkeria matxistaren aurkako lanean urratsak emateko helburuarekin, antolatzaileek deialdia luzatu diete herritarrei, azaroaren 25ean kolore moreko jantziak janzteko eta balkoiak morez apaintzeko.