Lider iritsi zen Hodei Lujanbio goizuetarra, Navartrail Kopako azkeneko probara. Eta ezin hobeto borobildu zituen lanak, Faltzeseko Pilon Trail lasterketan: garaipena lortu zuen bertan ere, eta horrekin, Nafarroako Kopa irabazi du Lujanbiok.
1:10:55 denboran osatu zuen 16 kilometroko ibilbidea goizuetarrak, eta minutu pasatxoko aldea izan zuen helmugan, Aitor Blanco bigarren sailkatuarekin (1:12:17). Arkaitz Galindez izan zen hirugarren, ia bost minutura (1:15:27). Proba berean aritu zen Jokin Uzkudun hernaniarra ere, eta 20garren sailkatu zen, 1:22:34 denborarekin.
9 kilometroko proban, berriz, Julen Gaztañaga hernaniarrak hartu zuen parte, eta maila ederrean aritu zen bera ere: seigarren sailkatu zen, 45:33 denborarekin. Xabier Chavarren izan zen nagusi (40:44).
Nafarroako Kopa irabazita ere, ez du atsedenik hartuko goizuetarrak, eta zita garrantzitsua dauka asteburu honetan: Reventon El Paso lasterketan ariko da, Nafarroako selekzioarekin, Kanariar Irletan. Mendi lasterketen Espainiako Txapelketa egongo da jokoan bertan, ibilbide oso gogorrarekin: 32 kilometro, eta 2.679 metroko desnibel positiboa. Zuzenean eskainiko dute proba, LaLigaSportsTV plataforman.