Herriko Covid kasuak eta konfinamenduak kontutan hartuta, osasun egoeragatik atzeratu zuten ur-txirrista, aurreko larunbatean paratu behar zutena. Eta jarri dute data berria: larunbat honetan izanen da.
Arratsaldeko 15:00etan hasi, eta hiru orduz izanen dute herritarrek ur-txirristaz gozatzeko aukera, 18:00ak arte. Goiko Itturritik Klaudioren etxera doan zatian paratuko dute ur-txirrista, hain justu.
Ondorioz, bidea itxita egonen da ibilgailuentzat, larunbatean, eguerdiko 12:00etatik arratsaldeko 20:00etara. Oinez pasatzeko izanen da aukera.
Tio Teronen Semeak dantza taldea, hurrengo igandean
Ur-txirristarekin, hasiera emanen diote udako kultur agendari, Goizuetan. Izan ere, bertan behera geratu ziren aurreneko biak, osasun egoeragatik: Umore Ona dantza taldeak uztailaren 10ean eskaini behar zuen emanaldia, eta hilaren 15ean ospatu behar zuten Karmen bezperako gaua.
Abuzturako prestatu dituzte, udako agendako beste bi saioak. Tio Teronen Semeak dantza taldea etorriko da hurrengo igandean, abuztuaren 1ean, eta emanaldia eskainiko du eguerdiko 12:00etan. Eta abuztuaren 13rako, Bertso txiki, infernu handi saioa antolatu dute, arratsaldeko 19:00etan hasita