Pasa den igandean, III. Larrate Trail mendi lasterketa jokatu zen Zarrakaztelun, eta Hodei Lujanbio goizuetarra nagusitu zen, 22 kilometroko proban.
Lujanbiok, ordubete, 33 minutu eta 32 segundu behar izan zituen lasterketaren ibilbidea osatzeko. Bigarren postua Ibai Makazaga oriotarrak eskuratu zuen, goizuetarra baino bost minutu eta 10 segundu beranduago helmugaratuta; eta Markina-Xemeingo Arkaitz Galindez izan zen hirugarren, sei minutu eta 21 segundura.
Gainera, Navartrail koparako laugarren proba puntuagarria zen Larrate Trail, eta dagoeneko berak zeukan lidertza sendotu du korrikalari goizuetarrak, abuztuan Faltzesen jokatuko den Pilon Trail lasterketaren faltan.