Pandemia garai honetan ere, morez jantziko da Goizueta. Eta horretarako, lau eguneko plana prestatu dute, etzi hasita, martxoaren 8ari begira.
Zootropolis pelikula jarriko dute ostiralean, haurrei zuzenduta. Udaletxeko ganbaran izanen da, arratsaldeko 19:00etan hasita. Eta ostiraletik bertatik, leihoak eta balkoiak kolore morez apaintzeko deia luzatu dute.
Larunbatean, berriz, kirolerako tartea eginen dute. Goizuetara ekarriko dute Lilatoia aurten, eta mixtoa izanen da. Horrela, lau laguneko taldeetan banatuko dituzte partehartzaileak, bakoitzak soinean zerbait morea jantzita duela; eta 17:00etan hasiko dute lasterketa, herriko plazan. Parte hartzeko, hori bai, aldez aurretik eman behar da izena, ostiral arratsaldeko 17:00ak arte: Amaia kafetegian, edo goizutakoemakumeak@gmail.com emailean.
Kultur agendan iragarri bezala, helduentzako ipuin kontaketa musikatua izanen da igandean, arratsaldeko 18:00etan, udaletxeko ganbaran: Hego haizearen ipuinak. Lurdes Iriondoren ipuinak dira, eta Amaia Elizagoienek kontatuko ditu.
Eta astelehenean, martxoaren 8an, elkarretaratzea eginen dute 18:00etan plazan. Gainera, Hip-Hop dantza taldearen emanaldia eta zuzeneko musika ere izanen dituzte bertan. Eta noski, egun horretan ere zerbait morea janztea eskatu dute.
Era berean, jarduera guztietan izanen da beharrezkoa, musukoa erabiltzea.
MARTXOAK 8 - EGITARAUA
GOIZUETAN
Martxoak 5, Haurrentzako zinea: Zootropolis, 19:00etan udaletxeko ganbaran.
Martxoak 6, Lilatoi mixtoa, lau laguneko taldeetan. 17:00etan hasiko da, herriko plazan. Izenematea, ostiraleko 17:00ak arte: goizutakoemakumeak@gmail.com edo Amaia kafetegia.
Martxoak 7, Ipuin kontaketa musikatua: Hego haizearen ipuinak. 18:00etan udaletxeko ganbaran, Amaia Elizagoienen eskutik.
Martxoak 8, Elkarretaratzea, 18:00etan plazan. Hip-Hop dantza taldearen emanaldia eta zuzeneko musika izanen dira.
*Jarduera guztietan beharrezkoa izanen da musukoaren erabilera.