81 urteko Goizuetako bizilagun bat hil zen atzo, Pagotxuri inguruko landa-bide batean izandako trafiko istripu batean, Foruzaingoak jakitera eman duenez. 20:55etan, biktimaren semeak abixua eman zuen, desagertu egin zela, eta bilaketa-dispositibo bat jarri zuten martxan. Amildegi batean aurkitu zuten herritar batzuek, kotxearekin bidetik atera eta bertara erorita; eta zuhaitz haundi bat jota, hilda aurkitu zuten gizona.
Herritar talde batek aurkitu zuen kotxea, desagertutako pertsona barruan zela; eta bertara azaldu ziren Foruzaingoa, Goizuetako suhiltzaile boluntarioak eta Nafarroako Suhiltzaileak.
Artikutzan, beste auto bat errekara erorita
Atzo goizaldean, berriz, beste gizon bat erreskatatu behar izan zuten Goizuetako suhiltzaileek eta mediku-erizainek, 05:45ak aldera. Artikutzan, kotxearekin bidetik atera eta errekara erori zen. Gizona bertatik atera, eta ospitalera eraman zuten.
