Espero baino lehenago esan behar izan dio agur Aritz Zubiri goizuetarrak, Oriamendi Torneoari. Galdu egin zuen ostegunean ere, Etxarrirekin batera, Segurola eta Zalduaren kontra (40-34). Eta horrekin, txapelketatik kanpo geratu dira.
Kontrarioak gehiago izan ziren hasieratik, eta partiduaren lehenengo zatian Etxarrik eta Zubirik eutsi egin bazioten ere (20-14), bigarrenean ez zuten aukerarik izan, eta 17 tantora haunditu zuten aldea, Segurolak eta Zalduak (37-20). Emaitza horrekin, semifinaletara sailkatu dira Segurola eta Zaldua, 10 punturekin.
Osteguneko beste partiduan, Goikoetxea V eta Labaka nagusitu ziren, lehia ezin estuagoan, Urrutia II eta Aizpururen kontra (40-39). 34-39 izan ziren atzetik, eta 6-0eko partzialarekin eman zioten buelta, erabakita zirudien partiduari. Semifinaletara pasea lortu dute horrela, 12 punturekin; eta 8 puntu dauzkate Urrutiak eta Aizpuruk.