Urtearen aurreneko erdian bukatu zituen Goizuetako Udalak, Iriartenea edo Tifanitxo eraikina barrutik konpondu eta berritzeko lanak; eta «azkeneko ukituen faltan» geratu zen, erabiltzen hasi ahal izateko. Falta ziren lan horietako batzuk, Udalak eginen ditu; baina beste batzuetarako, auzolana deituko zuela jakinarazi zuen, pandemiak ahalbidetzen zuenean.
Eta jarri du hitzordua, dagoeneko: datorren larunbatean elkartuko dira. Goizeko 09:00etan hasiko dira lanean, eta herritar guztiei luzatu diete gonbitea eta deia, bertaratu eta lanekin laguntzeko. Tifanitxo eraikineko gelak margotu eta txukuntzea izanen da egitekoa.
Bertan jarri duten komun publikoa, dagoeneko erabilgarri dago, azarotik; eta eraikineko lanak bukatutakoan, sei lokal izanen ditu erabilgarri eraikinak: lau aurreneko solairuan, eta beste bi bigarrenean. Lokal bana izanen dute Gazte Asanbladak, Ezker Abertzaleak, GoizuKoop kooperatibak eta Basauntz elkarteak; eta beste biak, izan daitezke ikastaro eta tailerretarako, hitzaldietarako...