Jatetxe eta tabernak itxita, eta norberaren herritik ezin urrundu, mendira edo paseoak ematera joateko aprobetxatu zuten atzoko eguraldi ederra gehienek, Hernanin eta Astigarragan. Goizuetan eta Aranon, ordea, bazuten plan berezirik: Mendialdeko Azoka paratu zuten Goizuetako kaleetan barna, eskualdeko nekazari eta artisauen postuekin, goizetik eguerdira.
Ez zen ohiko azoka izan igandekoa; herriko plaza edo frontoia hartzen duten horietakoa. Zirkuitua prestatu zuen antolakuntzak, eta herriko kaleetan sakabanatu zituzten postuak, pilaketak saihestu eta azokako sarrera-irteerak eta aforoa kontrolatu ahal izateko.Segurtasun neurri guztiak beteta, asko eta asko izan ziren azokara gerturatu zirenak, eta txanda itxaron zutenak, eskualdeko ekoizleen postuak ikusteko.
Denetik topatu zuten bertan: bitxiak, zapatak, eztiak, gaztak, mermeladak, joareak, behekiak, egur-lanak, barazkiak, ukenduak, pinturak, poltsoak...
Felix Loiarteren argazkietan ikusi daitezke, postu horiek guztiak, gaineko albumean.