Badira aste batzuk, abiadura moteltzeko badenak kendu zituela Goizuetako Udalak, herriko sarreretatik. Eta kendu izanaren arrazoia eman nahi izan du aditzera: «Nafarroako Gobernuak eskatuta kendu ditugu. Jakinarazi zigutenez, mota honetako badenek ez omen dute legea betetzen, eta hortaz, kentzeko agindua eman ziguten», azaldu dute. Orain, Udalak baloratuko du zein neurri hartuko dituen, aurrerantzean abiadura moteltzeko.
Edonola ere, Udalak gogorarazi du, momentu honetan koxkarik ez egon arren, abiadura muga errespetatu behar dutela: herrigunean, 40 kilometro ordukoa da abiadura muga.
Bestalde, herritarrei gogorarazi nahi izan die Udalak, debekatua dagoela motordun ibilgailuekin ibiltzea, bidegorrian eta Errekaundi pasealekuan. Bidegorrian, inguruko etxeetan bizi direnak soilik sartu daitezke motordun ibilgailuekin.