Ia 7 hilabeteko etenaren ostean, datorren ostiralean berrabiaraziko da Bardoak 2020, Nafarroako taldekako bertsolari txapelketa. Bi finalaurreko eta finala jokatzear zirela eten zen txapelketa martxoan, COVID-19aren pandemiaren eraginez. Orain, etenaldi luze honen ondoren, ostegunean, urriaren 2an, jokatuko dira bi finalaurrekoak, Goizuetan eta Jaunsaratsen. Finala urriaren 17an izango da, Lizarran.
Nafarroako Bertsozale Elkarteak, tokiko antolatzaileekin batera, konpromisoa hartu du pandemia egoerak eskatzen dituen segurtasun eta prebentzio neurri guztiak betetzeko. «Gauzak horrela, aforoak mugatu eginen dira, segurtasun tarteak mantenduko dira, aretoetara sartzeko eskuak garbitu beharko dira, eta musukoa ezinbestekoa izanen da, saio guztian zehar».
Goizuetako osteguneko saioa Lesakako Arranopola eta Malerreka-Baztango Bertsonautak taldeen artean jokatuko da. Bertan erabakiko da bi taldeetako nork eskuratzen duen finalerako pasea.
Sarrerak salgai, 3 euroan
Goizuetako Udaletxeko ganbaran jokatuko da Bardoak 2020 Nafarroako Taldekako Bertsolari Txapelketako finalaurreko bat, eta sarrerak salgai daude 3 euroan, estankoan. Basaburuako saioan, ordea, egunean bertan izanen dira sarrerak salgai, aretoan bertan. Bi kasuetan, 3 euroko salneurria izanen du sarrerak.
Txapelketako finala, aldiz, urriaren 17an izanen da, Lizarrako Ikastolan. Finalerako sarrerak aurrez salduko dira, irailaren 28tik aurrera, Ikastolan bertan, eta baita www.bertsosarrerak.eus atarian ere. Saldu gabe geldituko balira, finalaren egunean bertan ere jarriko lirateke salgai, 15:30etatik aurrera, leihatilan.