Carlos Gimeno Nafarroako Gobernuko Hezkuntza kontseilariak eta Santos Indurain Osasun kontseilariak ostiralean jakitera eman zituzten Nafarroako ikastetxeetan hartuko diren neurri berriak, COVID-19ak sortutako pandemia egoera dela eta.
Hezkuntza modalitatea aurrez aurrekoa izango den arren, urritik aurrera eskolak goizez soilik emango dituzte Nafarroako ikastetxeetan. Bestalde, jangela zerbitzua mantendu egingo da, baina eskolaz kanpoko jarduerak bertan behera geldituko dira. Eta Haur Hezkuntzako ume kopuruari dagokionez, datorren ikasturtean gehienez hogei ikasle egongo dira ikasgela bakoitzeko.
Lehen Hezkuntzako 5garren mailatik gora, maskarilla
Beste neurrietako bat maskarillaren erabileraren ingurukoa da. Izan ere, Lehen Hezkuntzako bosgarren mailatik gorakoentzat derrigorrezkoa izango da. Aldiz, laugarren maila arteko ikasleentzat hautazkoa izango da. Hala ere, jantzi egin beharko dute eremu komunetan, ikastetxera sartzerakoan eta handik irteteko orduan. Autobusean ere ikasle guztiek jantzi beharko dute. Azken kasu honetarako, salbuespen izango dira 3 uretik beherako haurrak. Txikienek segurtasun distantzia mantendu beharko dute beraien artean, baina autobusean ez dute maskarilla jantzi beharko.