Amabirjin fiestak bertan behera geratu dira Goizuetan, baina herriaren jarduna ez da geratu. Herriak bizi jarraitzen du eta oraindik eta biziago bertan erosten badira produktuak. Honela, Goizuetako Udalak ere jarri zuen martxan herriko komertzioari laguntzeko deskontu bonoen sistema, pasa den uztailean eta oraindik ere abian dago.
Herritarrek 5 euroko bost bono jaso zituzten (25 euro guztira), 20 euro ordainduta. Guztira, 300 bono sorta banatu ziren uztaila eta abuztuan zehar erabiltzeko.
Goizuetan erroldatuta daudenek bakarrik izan dute bonoak eskuratzeko aukera, eta 16 urtetik gorakoek soilik. Herritar bakoitzak, bi bono sorta erosi ahal izan ditu gehienez. Hori bai, norberaren sorta eta beste hiru lagunena ere erosi dezake bakoitzak, betiere guztien nortasun agiria erakutsita eta haien datuak emanda.
Ondorengo komertzioetan erabili daitezke oraindik bono horiek: Zubidenda, Coviran, harategia, farmazia, estanko eta arropa denda, Izkina, Mutu, Zubiondo, Oxeguarda, Iskibi, eta Irati eta Kiribil ileapaindegiak.
«Herrian kontsumitzeko ohiturari eustea», helburua
Kanpaina honetan, 1.500 euroko inbertsioa egin du Udalak, berak jarriko baititu bono sorta bakoitzaren 5 euroak. Eta horrekin, gainera, lortuko da bonoen 7.500 euroak gelditzea herrian bertan.
Helburua da, «herriko komertzioetan kontsumitzeko ohiturari eutsi, eta konfinamendu garaian ixtera behartuta egon diren komertzioei laguntzea».