Goizuetako Udalak ere jarri du martxan deskontu bonoen sistema, herriko komertzioari laguntzeko. Herritarrek 5 euroko bost bono jasoko dituzte (25 euro guztira), 20 euro ordainduta. Guztira, 300 bono sorta banatuko dira, eta gaur eta bihar izanen da aukera, horiek eskuratzeko: udaletxeko orapean egonen dira, gaur 18:00etatik 20:00etara, eta bihar 10:00etatik 13:00etara.
Goizuetan erroldatuta daudenek bakarrik izanen dute bonoak eskuratzeko aukera, eta 16 urtetik gorakoek soilik. Herritar bakoitzak, bi bono sorta erosi ahal izango ditu gehienez. Hori bai, norberaren sorta eta beste hiru lagunena ere erosi dezake bakoitzak, betiere guztien nortasun agiria erakutsita eta haien datuak emanda.
Bono horiek, datorren astelehenetik aurrera erabili ahal izanen dira, abuztuaren 30era arte, Goizuetako komertzioetan: Zubidenda, Coviran, harategia, farmazia, estanko eta arropa denda, Izkina, Mutu, Zubiondo, Oxeguarda, Iskibi, eta Irati eta Kiribil ileapaindegiak.
«Herrian kontsumitzeko ohiturari eustea», helburua
Kanpaina honetan, 1.500 euroko inbertsioa egin du Udalak, berak jarriko baititu bono sorta bakoitzaren 5 euroak. Eta horrekin, gainera, lortuko da bonoen 7.500 euroak gelditzea herrian bertan.
Helburua da, «herriko komertzioetan kontsumitzeko ohiturari eutsi, eta konfinamendu garaian ixtera behartuta egon diren komertzioei laguntzea».