Martxan jarri da Euskal Herriko Mus Txapelketaren XII. edizioa. Toki batzuetan, Ereñotzun, esaterako, jokatu dira aurreneko kanporaketak, eta gaurkoa Goizuetaren txanda izanen da.
Arratsaldeko 16:00etan hasita, Umore Ona elkartean jokatuko da aurreneko kanporaketa. Bikoteko 20 euro balio ditu.
Finalak, otsailean eta martxoan
Gaurko kanporaketan aurrera egiten dutenek, herrialdeko finalerako sailkatzea lortuko dute. Final hau otsailaren 29an jokatuko da.
Hor aurrera egiten dutenek, berriz, Euskal Herriko finala jokatu ahal izanen dute. Hau martxoaren 14an jokatuko da, Araban; Zigoitiako Gopegin, zehazki.
Sari potoloak
Aurreneko kanporaketa honetan aurrera egin eta final nagusietara iristeko aukerarik ez dute faltako goizuetarrek. Iaz, Juanito eta Iban Eskuderok lortu zuten Nafarroako finalerako sailkatzea. Eta 2018an, are balentria haundiagoa lortu zuten Alain Goizueta eta Iban Eskudero berak; izan ere, Nafarroakora ez ezik, Euskal Herriko final nagusirako ere sailkatu ziren, eta aurreneko 32 bikoteen artean geratu ziren.
Ordukoan bezala, sari potoloak izanen dira aurten ere. Herrialdekako finaletan txapel eta garaikurrak, otorduak, egonaldiak... Final nagusian; baita 100 eta 3.000 euro arteko sariak ere!