Denboraldi bikaina izan zuen 2019koa, motokroseko enduro modalitatean, Jon Makazaga Otxandorena goizuetarrak; eta bigarren bukatu zuen, Euskadiko Txapelketan. Emaitza horren saria, joan den asteartean jaso zuen, Durangon. Bertan egin zuen Euskadiko Motoziklismo Federazioak, modalitate guztietako txapelketen sari banaketa ekitaldia.
Eneko Camino eta Aritz Antxia bizkaitarrekin batera igo zen taula gainera Makazaga, haiek izan baititu podiumean lagun, 2019ko txapelketan: 130 punturekin izan da txapeldun Camino; 124rekin bigarren Makazaga; eta 94rekin hirugarren Antxia.
Guztira, zazpi proba jokatu zituzten, maiatzean hasi eta urrian bukatu. Erregulartasuna izan du armarik onena goizuetarrak, aurreneko bosten artean sailkatu baita beti: bosgarren izan zen Aibarren, hasteko; hirugarren Gueñesen, ondoren; bosgarren Zallan, Irañetan eta Arratzun, segidan; eta hirugarren azkeneko bi probetan, Zallan eta Elgoibarren. Azkeneko probaren aurretik, jakina zen Caminok irabaziko zuela (ez zuen parte hartu Elgoibarren), Makazagak urrutiegi baitzeukan; baina bigarren postua zegoen jokoan. Goizuetarrak 20 punturen abantaila zeukan alde, eta Antxia baino gehiago izan zen, gainera, 11garren izan baitzen lehiakidea.
Guztira, 25 partehartzaile izan ziren, Euskadiko Txapelketan, Makazagaren kategorian, elite mailakoan.