Herri ondasunak herritarrek aprobetxatzeko eta erabiltzeko asmoari jarraituz, egur loteak eskaini ditu Goizuetako Udalak; eta orain dute eskaerak egiteko epea, goizuetarrek. Etxean sua egiteko egurra nahi duenak, otsailaren 14ra arte egin dezake eskaera, udaletxean.
Horretarako, zenbait baldintza bete beharko dituzte eskatzaileek: adinez nagusia izatea, edo adingabe burujabea nahiz judizialki gaitua; Udalaren erroldan bizilagun bezala inskribatuta egotea, urtebeteko antzinatasunarekin; Udalarekin dituzten zerga betebeharrak egunean izatea; eta aurreko urteetako egur loteei dagokien kuotaren ordainketa egunean izatea.
Udaletxean aurkeztu behar dira eskaerak, honako agiriekin batera: NANaren fotokopia eta kontu korrontearen zenbakiaren fotokopia; Goizuetan gutxienez urtebetez erroldatuta daramala egiaztatzen duen agiria; eta Udalarekiko zerga betebeharrak egunean dituela egiaztatzen duen agiria.
Eskaerak adina egur lote baldin badaude, egurra emanen zaie eskaera egin eta baldintzak betetzen dituzten guztiei. Bestela, zuzentasun eta justizia irizpideetan oinarrituko da Udala, eta lehentasuna emanen die familia-unitateko diru-sarrera gutxien dutenei, datu objektiboetan oinarrituta; Pertsona Fisikoen Errentaren gaineko Zergan, esaterako.
Bakoitzari emanen zaion egur lotea, udaletxeko iragarki taulan argitaratuko dute; eta ordutik hasita, hiru hilabeteko epea izanen dute onuradunek, jasotzeko. Egurra zuzenean erabiltzeko da, eta ezinen dituzte berriro saldu.