Iritsi da goizuetarrentzako hain kuttuna eta maitatua den Feria Eguna eta ez dago aitzakiarik bertara ez hurbiltzeko. 16garren edizioa da aurtengoa eta dena prest dago ongi irteteko, euria egin ezkero ere prestatu dituzte leku alternatiboak. Egun osoan luzatuko da festa.
Goizeko 10:00etan hasiko da feria, eta makina bat artisau posturekin batera, giroa jarriko dute trikitilariek ere. Talogileak ere izanen dira, hamaiketakoa egin nahi duenarentzat; eta erakustaldiak eskainiko dituzte artisauek, goizean zehar.
Ardi eta behorrak kaleetan barrena ikusteko aukera izanen da goizean bertan, artzainek eginen duten itzuliarekin. Eta haien ondotik, herri kirolariek hartuko dute txanda: desafioa eginen dute, eguerdian.
Esan, euria egitekotan postuak eskoletako frontoian jarriko direla eta aziendak plazan mantenduko dira. Desagertzekotan egon den Betizua, ferian bertan ikusteko aukera ere izanen da, Goizuetan.
Euria egin ezkero bazkaria
herriko frontoian eginen da
Huts eginen ez duen beste zita, herri bazkaria izanen da eta kasu honetan euria protagonista bada herriko frontoian eginen da.
Bertako produktuekin osatutako menua prestatu dute: babarrunak, betizu gisatua eta postrea. Arratsaldean, musika saioa ere izanen da, giro ederrari segida emateko. Bixentek eskainiko du, 18:30etan hasita.
Feriara gerturatzeko gonbitea luzatu dute antolatzaileek, eta baserritarrez janzteko deia egin dute.