Gaur aurkeztuko dute Arnasa Gara kanpaina, Goizuetan; euskeraren arnasgune diren beste hainbat herritan egin duten bezala. Xalto eskolako jangelan izanen da saioa, arratsaldeko 19:00etan hasita; eta bertan, aitortza eginen diete, arnasguneetako herritarrei. Helburu bikoitza izanen du ekitaldiak: «arnasguneen garrantzia eta kontzeptua bera helarazi nahi diegu arnasguneetako herritarrei; eta horrekin batera, merezi duten aitortza egin nahi diegu, urte askotan eta belaunaldiz belaunaldi euskeraren alde egin duten lanagatik, lan inkontzientea askotan», azaldu du Miren Osak, kanpainaren koordinatzaileetako batek.
Eta kanpaina aitortu eta aitortza egitearekin batera, bertaratuek primizian ikusi ahal izanen dituzte, Kartzela serie digitaleko aurreneko kapituluak. Abenduan estreinatuko da, eta zazpi kapitulu izango ditu, Hiru Damatxo ekoiztetxearen lanak. Barakaldoko BECen harrapatuta geratu diren sei lagun dira protagonista; guztiak, arnasgune diren herrietakoak. Bakoitza toki batean geratu da harrapatuta, eta elkarrekin topo eginen dute pixkanaka. Eraikinetik nola atera pentsatzen hasiko dira orduan.
Web serieko aktoreetako bi egonen dira Goizuetako aurkezpenean, eta esketx moduko bat ere eskainiko dute zuzenean, ekitaldia hasteko. Gainera, saioaren bukaeran, bi kapituluak ikusi ondoren, solasaldia izanen da, bi aktoreekin, «euskalkiei, estereotipoei eta abarri buruz; web seriean zein arnasguneetan, egunerokotasunean bizitzen diren errealitateak. Gai interesgarriak ateratzen dira solasaldi horietan», adierazi du Miren Osak. Guztira, ordubete inguruko saioa izanen da.
«Euskaldun berrietan jarri da fokua beti, eta ez euskeraren leku tradizionaletan»
Kanpaina martxan jarri dute Hiruko Ituneko kideek (Eusko Jaurlaritza, Nafarroako Gobernua eta Iparraldeko Euskararen Erakunde Publikoa), UEMAk (Udalerri Euskaldunen Mankomunitatea), eta Gipuzkoako eta Bizkaiako Foru Aldundiek.
«Ez da sekula egin horrelako kanpaina bat, ez da inoiz fokua jarri euskaldun hauetan. Euskaldun berrietan jarri izan da beti, eta ez euskeraren leku tradizionaletan, hitzaren zentzu onenean. Hortik etorri zen, aitortza egiteko beharra», dio Osak.
Joan den urtean, arnasgune diren 11 herritan egin zituzten partehartze saioak, «haien errealitatea eta bizipenak ezagutzeko». Horrekin hasi zen kanpaina, eta aurkezpen ekitaldi hauek eman diote segida. «Baina ez zaie soilik erreferentzia egiten aurkezpena eginen den herriei; inguruko herri txikiak ere arnasgune izan daitezke».
Bigarren fase bat ere izanen da aurrerago, arnasguneen barrura begira baino, kanpora begirakoa izanen dena, «zooma urrundu, eta Euskal Herriko gainerako zonaldeetan zentratuta», azaldu du. Orduan, zonalde horietako euskaldunei zabalduko zaie, arnasguneen garrantziari buruzko mezua. Abenduaren erdialdetik aurrera izanen da hori, serie digitala ikusgai jartzearekin batera, interneten: www.kartzela.eus.
Kanpaina honekin, gainera, sortu daitezkeen zenbait eztabaida saihestea eskatu dute bultzatzaileek: arnasguneetan edo hiri haundietan jarri behar ote den indarra; euskalkiak edo euskera batua elkarren kontra jartzea; edota esatea kanpokoek euskera ez ikastearen ondorio dela euskera-mailak behera egitea zenbait herritan, baita arnasguneetan ere.