Astebete besterik ez da falta, urteko egun kuttunenetako bat ospatzeko, Goizuetan. Gaur zortzi, datorren larunbatean, izanen da Feria Eguna. 16garrenez ospatuko dute aurten, azienda, artisau eta nekazari feria, eta egun osoan luzatuko da festa.
Goizeko 10:00etan hasiko da feria, eta makina bat artisau posturekin batera, giroa jarriko dute trikitilariek ere. Talogileak ere izanen dira, hamaiketakoa egin nahi duenarentzat; eta erakustaldiak eskainiko dituzte artisauek, goizean zehar.
Ardi eta behorrak kaleetan barrena ikusteko aukera izanen da goizean bertan, artzainek eginen duten itzuliarekin. Eta haien ondotik, herri kirolariek hartuko dute txanda: desafioa eginen dute, eguerdian.
Bazkarirako txartelak salgai, ostegunera bitarte
Huts eginen ez duen beste zita, herri bazkaria izanen da. Bertako produktuekin osatutako menua prestatu dute: babarrunak, betizu gisatua eta postrea. Eta txartelak, dagoeneko salgai daude, Amaia kafetegian: langileek 21 euro, ikasle eta langabetuek 18 euro, eta 9-16 urteko artekoek 10 euro; 8 urtetik beherakoentzat doan izanen da. Txartelak erosteko epea, datorren ostegunean bukatuko da, hilaren 28an, eguerdiko 14:00etan.
Betizua, ferian bertan ikusteko aukera ere izanen da, Goizuetan. Desagertzeko arriskuan dagoen espezie autoktonoa izanik, bertako inguruetan daude betizu behi gehienak.
Arratsaldean, musika saioa ere izanen da, giro ederrari segida emateko. Bixentek eskainiko du, 18:30etan hasita.
Feriara gerturatzeko gonbitea luzatu dute antolatzaileek, eta baserritarrez janzteko deia egin dute. Beste urte batez, elkarlanean antolatu dute, herriko hainbat eragilek: Umore Ona elkarteak, Guraso Elkarteak, Gazte Asanbladak, Ezker Abertzaleak, Kultur Taldeak, Goizuetako Udalak, eta beste hainbat herritar, tabernari eta baserritarrek.
XVI. FERIA EGUNA, azaroaren 30ean
10:00, Feriaren hasiera: bertako barazkiak, babarrunak, arrautzak, eztiak edota gaztak, artisau postuak, eta abereak.
Goizean zehar, Talogileak, trikitilariak, erakustaldiak...
12:00, Herri kirol desafioa.
14:00, Bazkaria: bertako babarrunak, bertako betizu gisatua eta postrea.
*Bazkarirako txartelak salgai, Amaia kafetegian: langileek 21 euro, ikasle eta langabetuek 18 euro, eta 9-16 urtekoek 10 euro; 8 urtetik beherakoek doan. Epea, azaroaren 28ra arte, eguerdiko 14:00etan.
18:30, Musikaldia, Bixenterekin.