Agendarekin aurrera egiten ari dira goizuetarrak. Azaroari jubilatuek eman zioten hasiera, eta datozen egunetan adin guztietako herritarrentzako izanen da zerekin entretenitu.
Legarreta eta Goizueta, eta Salaberria eta Goizueta, mus eta trukean txapeldun
Larunbatean jokatu zen 65 urtetik goitikoen mus eta truk txapelketa, Umore Ona elkartean. Museko txapeldunak izan dira Manolo Legarreta eta Joxe Goizueta, eta bigarren sailkatuak, Antonio Zubeldia eta Juanito Eskudero. Trukean, berriz, Felixa Salaberria eta Pakita Goizueta izan dira irabazleak eta bigarrenak, Maria Pilar Arratibel eta Dolores Eskudero.
Horrela hasi zuten jubilatuek asteburua, eta igandean, festa giroan murgildu ziren bete-betean. Umore Ona Pilota Elkarteak antolatutako Txapelketako aurreneko partiduekin gozatu ondoren, meza izan zuten, eta bazkaria gero, Luis Elizegiren musika emanaldiarekin borobilduta. Entretenituta pasa zuten igandea.
Azukrearen kontsumoari buruz, ostiralean
Datozen egunetan ekitaldi gehiago ere izanen dira, kasu honetan, adin guztietako herritarrei zuzenduak. Hasteko, ostiralean, Azukrearen gazi-gozoak hitzaldia izanen da eskolako jangelan, 19:00etan, azukrearen kontsumoaren inguruko argibideak emateko. Gero, larunbatean umeentzako jolasak izanen dira, frontoian.
Hurrengo asteburuan Arnasa Gara aurkeztuko da, eta Feriak borobilduko du hilabete, azken larunbatean.