Gozoa izan du estreinaldia profesionaletan, borobila, Iker Salaberria goizuetarrak. 13-22 irabazi zuen debuteko partidua, ostiralean, Tolosako Beotibar frontoian. Rezustarekin nagusitu zen, Elezkano II eta Bikuñaren kontra.
Baina emaitza bakarrik ez, goizuetarrak erakutsitako joko ausarta izan zen nabarmentzekoa, ostiralean.
Hasierako urduritasuna, berehala uxatu
Urduritasun pixka bat izanen zuen hasieran, hala ere: aurreneko sakea egin, eta errematea txapa behera bota zuen; baita beste gantxo bat ere bai, hasierako tanto horietan.
Baina berehala uxatu zuen urduritasuna, eta ausart jokatu zuen, partidu osoan zehar. Erakustaldia eman zuen gainera, partiduaren aurreneko erdian. Tanto ederrak bukatu zituen, bereziki txokoan moztuta zein dejadaz ia segidan egindako lauzpabost. Eta horri esker, ihes egin zuten markagailuan, urdinek (2-8). Horrek konfiantza eman zion Salaberriari, eta jokoaren dominatzaile izan zen, hainbatetan.
Lehia polita izan zuen aurrean Elezkanorekin, zenbait tanto korapilatsutan, eta batzuetan akatsak egin bazituen, besteetan tanto horiek ondo bukatzen asmatu ere bai, defentsan primerako lana egin ondoren. Rezusta atzean jaun eta jabe zela, tartea haunditzen jarraitu zuten, aurreneko atsedenaldira (4-12) zein bigarrenera (7-18) iristerako.
Bukaeran kosta zitzaion gehiago tantoak bukatzen goizuetarrari, Elezkano ere finago aritu zelako orduan. Baina hala ere, gantxoz lortu zuen tanto eder bat, aurrena, eta berak eman zion bukaera partiduari, gero, txokoan erdi parera gogor jotako pelota batekin.
Azkenean, bederatzi tanto eta sei akats egin zituen.
«Asko gozatu dut kantxan»
Partidua bukatu berritan, oso pozik azaldu zen Iker Salaberria: «asko gozatu dut kantxan, horrekin geratzen naiz. Egun ona izan dut, eta eguna daukazunean aprobetxatu egin behar da. Nire jokoa ausart aritzea da, hori zen gaur egin behar nuena, eta hala kokatu dut. Beñat atzean edukitzeak konfiantza ematen du, aurrean sartzeko. Gaur pilota asko izan dut, baina badakit beste batzuetan lan gehiago egitea tokatuko zaidala».
Goizuetar askoren babesa izan zuen harmailetan, baita pankarta bat ere, Pausoz pauso ametsak egi bihurtuz, aupa Iker! Etengabeak izan ziren partidu osoan zehar, bere aldeko oihu eta animoak.
«Eskerrak eman behar dizkiet zaleei, emandako babesagatik. Oso polita izan da eguna, goizetik hasita. Oso hasiera polita izan du bide honek, eta ea bide luzea den. Saiatuko gara gaurkoa bezalako egun asko izaten», nabarmendu zuen.