Podiumetik podiumera dabil Hodei Lujanbio goizuetarra, mendi lasterketetan; eta koxkarik altuenera igo zen igandean, Urdazubiko Kontrabandisten Lasterketan, sailkapen nagusia irabazita.
Bi probatara jokatu zen lasterketa. Larunbat gauean izan zen aurrenekoa, 9,5 kilometrokoa, 500 metroko desnibel positiboarekin. Jokin Arretxea bertizaranarra nagusitu zen (52:22), baina oso gertu iritsi zen Lujanbio, 33 segundura (52:55). Arantzako Asier Apezetxea izan zen hirugarren (53:13).
Ordu gutxira abiatu zen bigarren proba, luzeagoa: 22 kilometro eta 1200 metro positiboko ibilbidea osatu zuten larunbat goizean. Eta horretan ere, bigarren izan zen Lujanbio (1:55:26), Barañaingo Ander Ericeren atzetik (1:53:42). Haren herrikide bat, Aritz Arteta, izan zen hirugarren (2:00:33). Bi probetan egindako lan bikainak, garaipena eman zion goizuetarrari, sailkapen nagusian. Maria Loizu iruindarra nagusitu zen emakumezkoetan.