Gaurko goiza Goizuetako haurrek hasiko dute, 11:00etatik 14:00ak arte txikientzako puzgarriak egonen baitira eskolan. Horrez gain, toka txapelketa eginen da heldu eta umeentzat, 11:30ak aldera.
Jarraian, Nafarroako eta Gipuzkoako sagardogile onenen parte hartzearekin, sagardo probaketaz gozatzeko aukera izango da, herriko plazan. Amaitu ostean, 13:00ak aldera, Igandea txarangak kaleak animatuko ditu.
Bazkalordurako atsedenaldiaren ondoren, 16:00etan hasiko dira arratsaldeko ekintzak, berriro ere, haurrentzako puzgarriekin. Arratsaldeko 18:00etan, berriz, Jotak entzuteko aukera paregabea jarriko du Acordes Navarros taldeak. Ondoren, Igandea txarangak, berriro ere kaleak animatuko ditu, hauetan barrena abesti alaiak, dantzarakoak nahiz parranda girokoak, joz.
Gaualdera, Goittikiren aldeko bingoa jokatuko da ikastolan, 20:30ak inguruan hasita. Afal ostean, beatbox saioa izanen da Plazan, Bocabets Bomedia taldearen eskutik; ahotsarekin erritmo jolasak egiten dira saio hauetan. Festarekin jarraitzeko, Laiotz taldearekin dantzaldia izanen da herriko plazan, eta ezin hobe amaitzeko, Igandea txarangak berriro ere musika instrumentuak hartu, eta kaleak girotzen jarrituko du.
Biharko eguna, entzierroarekin hasiko da, Lasturreko zezenekin. Eta jarraian, erraldoiak eta buruhaundiak ibiliko dira herrian zehar. Larunbat gaua giro onean amaitzeko, DJ Bullen musikaz eta Igandea txarangarenaz gozatzeko aukera izanen da.