638 goizuetar eta 96 aranoar prest, biharko herri galdeketan haien hitza adierazteko

Orain bai; iristear da eguna. Mendialdean eta Bortzirietan Gure Esku Dago dinamikak antolatutako herri galdeketan parte hartzeko aukera izango dute bihar.
Goizuetan, 638 herritar dau­de galdeketan parte hartzera dei­tuta, eta Aranon, 96. Bor­tzi­rietan ez bezala, Mendial­dean bi galdera erantzun beharko dituzte, herritarrek hala adostuta: Nahi al duzu Nafarroako herritarrek gu­re etorkizun politikoa modu askean erabaki­tzea?; eta baiezkoa bada, Nahi al duzu Euskal Herri libre bateko herritarra izan?
Baiezkoa, ezezkoa edo boto zuria eman, garrantzitsuena parte hartzea dela azpimarratu dute hainbat herritarrek.

Erroldatuta eta 16 urtetik gora
Galdeketan parte hartu ahal izateko, erroldatuta dauden herrian eman beharko dute botoa herritarrek, eta 16 urtetik gora izan behar dira.
Aurkeztu beharreko agiriak di­­ra NANa edo pasaportea, edo ho­­rien ordez, EHNA edo gida-baimena eta udaletxeko errolda agiria.

Botoa eta festa
Goizeko 09:00etatik 20:00e­­tara egonen di­ra irekita hautetson­tziak, eta ma­kina bat ekintza ere izanen dira. 

GURE ESKU DAGO - HERRI GALDEKETA

EKAINAK 18 - Goizueta

09:00: Bozkaketa hasierako itxaferoa.
11:00: ‘Irumaita’ txaranga herrian.
11:30: Pilota torneoa Udaletxeko Orapen.
13:00: ‘Gure Esku Dago’ dantza emanaldia.
17:30: Txokolatada plazan.
18:00: Dantzaldia plazan.
19:30: Umore Ona abesbatzaren emanaldia.
20:00: Bozka kontaketaren hasiera.
Ondoren, bukaera ekitaldia.

Goizean zehar, eskulan erakusketa, luntxa, sagardo kupela...
Egun guzian zehar: Ohe elastikoa eta puzgarria.

EKAINAK 18 - Arano

Eguerdian: Parrillada.
Egunean zehar, musika eta bideo  emanaldiak kalean.

Goizueta - Fernando Goia ‘Pollo’

«Zuk pentsatzen duzuna bozkatu ahal izateak ilusioa egiten du»

GED dinamikak «herritarrak aktibatzeko lan haundia» egin duenez, herritarrek parte hartzea espero du Goiak.

«Dudarik gabe animatu» du Fernando Goia Pollok mundu guztia, biharko he­­­rri galdeketan parte har­tzera. «Ilusioa badaukat, kristorena! Zuk pen­tsatzen duzuna bozkatu ahal izateak ilusioa egiten du».

Giroa, nabaria
Goizuetarrek parte har­tzea espero du Goiak. «Gi­roa badago. Aurreko egu­ne­tan izan da bozka­tze­ko aukera, eta ikusi da jendea. Gainera, Gure Es­ku Dago dinamikak lan haun­dia egin du he­rri­tarrak aktibatzeko. Kon­­tzientzia badago».
Gero zer gertatuko den, auskalo. «Inportan­tee­na da norberari ematea eskubidea erabaki­tzeko. Ez nuke pentsatu nahi uste dudanaren kon­trako emaitza aterako de­nik. Baina he­rriaren ge­hien­goak zer erabaki nahi duen jakiteko da bozketa. Guk ez badugu boz­katzen he­rri­aren al­de, beste ba­tzuk hartuko di­tuzte erabakiak, gure iritzia kontuan hartu gabe». 

Arano - Kontxi Claver Oiarbide

«Orain arte ezagutu ez dugun aukera da, eta tokatzen zaiguna»

Galdeketaren alde aranoarren ia %50ak sinatuta,  orain ere beste horrenbestek parte hartzea espero du.

Buru-belarri ari dela dio Kontxi Claver Oiar­bi­dek, Aranoko herri galdeketa prestatzen, eta «se­kulako ilusioa» daukala. Jendeak ere parte har­tuko duela es­pe­ro du, galdeketaren al­deko sinadurak biltzean «ia %50ek sinatu» bai­tzuen; «hortxe jarri dezakegu helburua».

«Etorkizuna erabakitzeko gure eskubidea»
Aranoarraren ustez, «in­por­­tantea» da herri galde­ke­ta hau, «orain arte eza­gu­tu ez dugun aukera de­la­ko, tokatzen zaigun au­ke­ra, eta aukera his­torikoa».
Emaitza edozein dela ere, «inportanteena par­te hartzea tokatzen zaigula» dela dio. «Bozka­tzera jo­an­go direnetatik, batzuk al­de eta besteak kontra izanen dira, eta bat edo beste, onartu beharreko gauza izanen da».
Horregatik, animatu egin nahi du jendea: «Gu­re Esku Da­go, dinamika ko­lore eta sentsibilitate guz­tie­ta­ko jendea onartzen du­en mugimendua da. Etor­kizuna erabakitzeko gure eskubidea daukagu. 

Goizueta -  Felix Loiarte

«Jendearen iritzia jasotzea beharrezkoa iruditzen zait, zenbat eta gehiago, hobe»

Bozkatzera joango dela ziurtatu du Felix Loiartek.

Nork bere iritzia jasotzea garrantzitsua iruditzen zaiolako, biharko herri galdeketan parte hartuko duela dio Felix Loiartek, eta jendea ere horretara animatu nahi du. «Gal­de­ke­ta egitea ongi iruditzen zait, eta horregatik bozkatuko dut», dio.
Baina horrez gain, in­por­tantea dela ere azpi­ma­rratzen du. «Jendearen iri­tzia jasotzea beharrezkoa iruditzen zait, zenbat eta gehiagok eman, hobeto. Horrela guk pentsatzen duguna adierazteko aukera dugu, eta gure esku egongo litzake; ez besteek gugatik interperetatzen dute­naren esku. Azke­ne­an, parte hartzeak ez du esan nahi alde batera edo bestera pentsatzen duzula. Hori librea da, bakarra, zuk duzuna da aukera zure iritzia, edozein dela ere, adierazteko».

Nahikoa ilusio?
Hain zuzen,  emaitzak kezkarik ez diola sortzen dio. «Kezka sortzekotan, ea jendearengan nahiko ilusio pizten den edo ez ikusteak sortzen dit. Erantzun eskasa izango balu, hausnarketa beharko litzake, zergatia ikusteko». 

Goizueta - Juan Antonio Lekuona

«Norberak bere iritzia ematen ez badu, beste norbaitek eginen du»

Bihar Umore Ona abesbatzarekin kantuan ari beharko duela eta, aurretik eman du botoa Lekuonak.

Herri galdeketarekin «ilu­­sionatuta» dagoela ai­tortu du Juan Antonio Le­kuonak. «Ez dugu bes­te aukerarik izandu; le­hen­biziko aldia da, eta es­kubide hau aspaldi behar genuen», dio. Eta horrexegatik, «goizuetar askok parte hartzea espero» du.

«Inori ez dio kalterik egiten iritzia emateak»
Biharko herri galdeketan ez da izanen Juan An­to­nio Lekuona, Umore Ona abesbatzarekin, auroretan kantari ariko delako. Horregatik, lehendik eman du botoa, egin beharrekoa dela irudi­tzen baitzaio.
«Inori ez dio kalterik egiten iritzia emateak. Nor­berak egiten ez ba­du, beste norbaitek eginen du. Eta gero, ez du ba­lio besteek gaizki egiten dutela esateak».
Era berean, emaitzak ez du hainbeste kezka­tzen. «Hau saiakera bat da, lehenbiziko aldia. Beti utziko ditu ondorioak, eta emaitza gustokoa ez bada, desilusioa bat, baina ikasi egin behar da».
Horregatik animatu nahi ditu goizuetar guztiak herri galdeketan parte hartzera. «Dudarik gabe animatu egin nahi ditut, era normalizatuan iritzia ematera. Inori ez dio kalterik egiten, beraz, hitzak soberan daude!».

Goizuetako Udala eta Udalbiltza  - Mozioak

«Erabakitzeko eskubidea demokraziaren adierazpena» dela azaltzeko, bi mozio

Bihar 24 herritan eginen diren galdeketak babestu ditu Udalbiltzak. Goizuetako Udalak ere, maiatzeko Plenoan onartu zuen galdeketaren aldeko mozioa.

Gure Esku Dago dinamikak antolatuta, herri galdeketak eginen dira bi­har, Bortzirietako, Saka­nako eta Mendialdeko 24 herritan; tartean, Ara­non eta Goizuetan. Azken horretako Udalak, herritarrek aurkeztutako mo­zioa onar­­­tu zuen aho batez maiatzeko Ple­no­an, eta Udalbiltzak ere gal­deketak babesteko deia egin du.

«Herritar guztiak deitzen ditugu euren bozka normaltasunez eta aske ematera»
Goizuetako Udalak maia­tzaren 30eko Plenoan onar­­tu zuen aho batez herritarrek aurkeztutako mozioa.
«Ekainaren 18an gure udalerrian demokrazian sa­kontzeko ariketa bat dei­­tuta dago, izaera he­rri­tarra duena. Era­ba­ki­tze­ko eskubidea du hel­bu­ru, de­mokrazioaren adie­raz­pen gorena», azal­­­tzen da bertan.
Horrela, «Euskal He­rri­ko herritarrei bere etor­kizunaz erabakitzeko da­go­kien eskubidea eta gaitasuna» aldarrikatu di­-tuzte, eta baita ere, «askatasunez eta demokratikoki adierazitakoa errespetatua izan dadin duten eskubidea». 
Hori guztiagatik, eta «erabakitzeko eskubidea demokraziaren adierazpena» denez, herritar guztiak deitu dituzte, «euren bozka normaltasunez eta aske ematera».

«GED herri dinamikak esperantzarako leihoak zabaldu ditu»
Udalbiltza Partzuergoak adierazi du «kezkaz» bizi duela «Espainiako eta Fran­tziako gobernuek sa­rritan euskal herritarren borondatea urratzea». 
Ho­rren aurrean, or­dea, «GED herri dinamikak es­perantzarako leihoak za­bal­du» dituela dio, «gaur arte 124 herritan egin baitira Euskal He­rriaren etorkizun politikoa erabakitzeko herritarren borondatea era­­kutsi duten herri galdeketak». Horregatik, biharko galdetekak babestu ditu.