San Agustin eguna ospatuko da gaur Artikutzan, eta urtero bezala, goizuetar gutxi izango dira hitzordura huts eginen dutenak. Eta askok oinez eginen dute bizpahiru orduko ibilbidea.
Kotxeentzako, aparkalekua
Goizeko 08:00etan irekiko dituzte Artikutzako ateak. Kotxeentzako aparkalekua ere jarriko dute urtegiari buelta ematen dion pistan. Alde batetik sartu eta bestetik atera beharko da, norabide berean, eta kotxeari ez zaio buelta eman behar aparkatzerakoan.
Herri kirolak, postuak...
Goizeko 11:00etatik aurrera, ekintza ugari izanen dira: meza, pelota partidua, herri kirolak eta dantzaldia.
Horrez gain, egun osoan zehar, artisauen lanak ikusteko aukera izanen da, eta produktu desberdinak salgai egonen dira: taloak, gazta, pastelak, ogia... Bi taberna ere egokituko dituzte.
EGITARAUA
11:00, Meza. Egi Eder otxoteak parte hartuko du.
11:30, Pilota partidak: pasaka partida bat eta esku pelotako beste bat.
17:00, Herri kirolen erakustaldia:
Aizkolariak: Donato Larretxea-Joxe Mari Olasagasti/Aitzol Atutxa-Ugaitz Mugerza.
Harrijasotzaileak: Inaxio Perurena.
19:00, Dantzaldia Arizkungo Joxe Anjelen eskutik.