Euskeraren erabileran, udalerri euskaldunen tontorrean dago Goizuetakoa. UEMAk, Udalerri Euskaldunen Mankomunitateak, azterketa egin du, udal bakoitzeko sail guztiak kontutan hartuz, eta lau multzotan sailkatu ditu udal guztiak, euskeraren erabilera mailari dagokionez: abian, magalean, gorabidean eta tontorrean.
Ba maila gorenera igo dira Goizuetako eta Leitzako Udalak, gorabidean mailatik tontorrean mailara, azken hilabeteotan egindako lanari eta hartutako konpromisoei esker. Asteartean eman zuten prentsaurrekoa bi udalek, Leitzan, egindako lana eta «aurrerantzean herritarrek sumatuko dituzten aldaketak» azaltzeko. Bertan ziren Unai Loiarte alkatea, eta Zuriñe Lujanbio euskera zinegotzia.
«Euskerak zonaldean duen osasun ona bermatzeko ardura daukagu»
Lujanbiok azaldu zuen, arlo horretan «erantzukizun berezia» daukatela Goizuetak eta Leitzak: «euskeraren arnasgune garen udalerriok, euskerak zonaldean daukan osasun ona bermatzeko ardura daukagu». Eta nabarmendu zituen, Udala erabat euskalduntzeko hartutako neurriak: «bereziki, gure barne funtzionamendurako ekipoetako programak euskeraz erabiltzeko erabakiak eraman du Goizuetako Udala tontorrera». Eta argitu zuen, ez dela egun batetik bestera lortu duten zerbait: «egunez egun euskeraz bizi ahal izateko, administrazioa euskalduntzeko urte askotan lanean aritu diren herritar, ordezkari politiko eta UEMAko kideen meritua ere bada», azpimarratu zuen.
Miren Etxenike UEMAko teknikariak, bi udalak zoriondu nahi izan zituen, «emandako pausoengatik, eta tontorreraino heltzeko egindako lanarengatik».
Orain, eskualdeko hiru udal daude tontorrean, Areso ere maila horretan baitago lehendik ere.