Hitzordu entretenigarria izango da Ereñotzun larunbat honetan, arratsaldeko 18:00etan hasita, aizkora emanaldia izango baita auzoko frontoian. Emakumezkoen mailako punta-puntako aizkolariak ariko dira lehian.
Zehazki, lanean ariko dira hiru bikote, aurrez aurre: Malen Barrenetxea hernaniarra eta Nerea Arruti; Oihana Fernandez de Barrena eta Uxue Ansorregi; eta Laiene Pikabea ereñotzuarra eta Irati Astondoa.
Hori gutxi balitz, aizkolariek deskantsatzen duten tarteetan, erakustaldia eskainiko du Maddi Salterain harrijasotzaileak, publikoa ere entretenituta egon dadin tarte horietan.