Ekainaren 12tik 14ra ospatuko dituzte San Antonio jaiak Ereñotzun, baina aurretik izango dira bi jarduera, motorrak berotzeko, gaur eta bihar. Gaurko, Tapia eta Leturia musikari ezagunen kontzertua antolatu dute, talde majo batek lagunduta. Gaueko 22:00etan hasiko da, frontoian, eta doakoa izango da sarrera.
Bihar, berriz, Mus Txapelketaren 39garren edizioa jokatuko dute Ur Mia elkartean, arratsaldeko 16:30etan hasita.
Horien ondotik, datorren ostiralean hasiko dira festak Ereñotzun. Txirritako ikasleen jaialdia izango da 15:00etan, eta jolasak eta merienda segidan, Katiluzar Guraso Elkarteak antolatuta. 20:00etan botako dute txupinazoa, Auzo Udaleko ordezkariek eta izandakoek, jaiei hasiera ofiziala emateko.