Ereñotzuko auzotarren eta Urumea ibaiaren arteko harremana gertukoagoa izango da hemendik hilabete gutxira. Martxan daude jada zentral hidroelektriko zaharraren ingurua eraberritzeko lanak, eta ostegunean egin zuten proiektuaren aurkezpena Errenteriako, Hernaniko eta Ereñotzuko Udaletako ordezkariek.
Udaran hasi zituzten Ereñotzuko presa eraisteko lanak, eta dagoeneko kanalaren betelanarekin ari dira. Egindako lanak Urumeako zenbait espezie babesturen biziraupena erraztuko duela nabarmendu zuten ordezkariek: «Presa eraisteak izokinak eta ibai faunaren beste espezie batzuk Goizuetara eta Ezkurrako mendaterantz igotzea erraztuko du, orain arte Ereñotzuko presak galarazten zuena».
Zentrala Errenteriako Udalaren jabetzakoa denez, eurena izango da obren %67a finantzatzeko ardura (918.902 euro); gainerakoa, berriz, Hernaniko Udalak ordainduko du (%33, 451.162 euro). Ainara Atorrasagasti ingurumen zinegotziak adierazi zuen «apustu garrantzitsua» dela: «Hernanirentzat Urumea ibaia bizkarrezurra da; bere gainean eraiki gara eta bizi gara. Inbertsio potentea izango da bi udalentzat, baina apustu bat da. Eremuak lehengoratzeak garrantzi haundia du, espezieak lehengo egoerara itzultzeko».
Eragin soziala ereñotzuarrei
Naturarekin lotutako aldaketez gain, inguruaren eraberritzeak Ereñotzun eragingo duen aldaketa ere aipatu zuten prentsaurrekoan. Olatz Juantorena Ereñotzuko Auzo Udaleko alkateak adierazi zuen kanalaren betelanak auzoaren eta ibaiaren arteko lotura erraztuko duela: «Oztopo fisiko bat kendu dute. Horrez gain, paseatzeko leku bat ere sortuko da bertan, Ereñotzun topatzen hain zaila den eremu lau batekin». Atorrasagastik gehitu zuen horrelako ekimenak sustatzen jarraitzeko asmoa duela Hernaniko Udalak: «Bailarako herriak lotzeko modu bat da».
Zentral hidroelektrikoarekin, zer?
Obrak martxa onean doaz, eta epe laburrean amaituko dute pasealekua. Etorkizunera begira, zentral hidroelektrikoarekin zer egin zehaztea da erronka. Errenteriako Udalak aste honetan bertan onartu du jabetzaren lagapena Ereñotzuko Auzo Udalari egitea, eta Juantorenak azaldu zuen asmoa herritarrentzat erabilgarri jartzea dela: «Zentrala Ereñotzuren erdigunean dago. Gerora lanketa bat egin nahiko genuke, eremua berreskuratzeko eta auzotarrentzat eskuragarri jartzeko. Hala ere, inbertsio oso potoloa da Auzo Udal batentzat, eta momentuz lana eraikina mantentzea eta egonkortzea izango da».