Zita garrantzitsua daukate gaur bolari ereñotzuarrek, Usurbilen. Gipuzkoako Taldekako Txapelketaren semifinala jokatuko du Ur Miak bertan, arratsaldeko 18:00etan hasita, Legazpiko Danantzako taldearen kontra.
Aurrekoetan bezala, Ibon Miner, Aner Miner, Mikel Arroio, Iñaki Miner eta Leandro Miner ariko dira lehian, eta ligaxkako berbera izango da formatua: talde bakoitzeko bolari banaren arteko enfrentamenduak, 16 guztira, puntuak banatu eta garailea erabakitzeko. Berezitasun bat izango du semifinalak: berdinduta bukatuz gero, ez dute desenpaterik egingo; Ur Mia sailkatuko da finalera, ligaxkako sailkapenean ondoen sailkatu zelako (bigarren izan zen B multzoan, eta Danantzako hirugarren A multzoan).
Usurbilen bertan jokatu zen beste semifinaletako bat, atzo arratsaldean, Villabonako Behar Zanaren eta Zarauzko Zelai-Ondoren artekoa. Gainerako biek Zegamako bolatokia dute eszenatoki. Horietako bat asteartean jokatu zuten, eta Lasarte-Oriako Ostadarrek lortu zuen finalerako aurreneko txartela, Segurako Txoritegi menderatuta. Bestea gaur bertan jokatuko da: Gabiri A eta Ategorrieta, aurrez aurre. Datorren astean izango da finala.