Auzo Udala izango du Ereñotzuk laister. Onarpena eman du Diputazioak, eta maiatzeko hauteskundeetan erabakiko dute zein izango den Auzo Alkatea, eta zein izango diren lau juntakideak. Bitarte horretan, Junta Gestora bat izendatuko du Diputazioak; horren zain daude Olak auzo elkarteko kideak. Bitartean, «detaile txikiak» dauzkate zehazteko, batez ere, Hernaniko Udalarekin. Ilusio haundiz hartu dute Diputazioak erabaki duena, eta auzoak ere hala hartu duela ziur daude. Azaro bukaeran batzar nagusi bat egingo dute, hemendik aurrerako pausuak esplikatzeko, eta proposamen batzuk mahai gainean jartzeko.
Funtzionamendua zehazten
Auzo Elkarteak izango ditu, Auzo Alkatea, eta lau kideko junta bat. Horretarako langile bat izango dute, seguru asko, administrari bat. Funtzionamendua zein izango den aurrerago erabaki beharko da, eta talde horren lan bat hori izango da. Proposamen bat prestatzen ari da Olak auzo elkartea, funtzionamenduari buruzkoa. Batetik, Alkatea eta Junta izango lituzke, eta taldeak, gai jakin batzuk lantzeko: kultur taldea (orain arte auzo elkarteak egin duen lana); talde ekonomikoa (auzo udalak izan ditzakeen diru-laguntzak aztertzeko, adibidez); auzolanerako taldeak (obra txikiak, aisialdia, adineko auzotarrak, gazteak...); zonaldekako ordezkarien taldea (Lastaola, Epele, Fagollaga, Ereñotzu, Latxe-Abillats, Ubarroto, Ugaldetxo, Pagoaga), urtean behin edo bitan bilduko lirateke; azkenik, urtean batzar orokor bat edo bi egitea egoki ikusten dute. Argi utzi dute, aurrekoa proposamen bat dela, eta aldatu egin litekeela.
Auzolana, Ereñotzuko betiko ohitura
Auzolanean gauza asko egin izan dira Ereñotzun: ikastola zaharra, apaiz etxea, bolatokia, eliza eta teilatua berritzea, Pikoagako frontoia berritzea... Auzo elkarteko kideek uste dute, auzolanak Ereñotzun funtzionatzen segi behar duela, eta «bakoitzak dakien horretan» lagunduko duela, orain arte bezala. «Azkena, deialdia egin genuen txukunketarako, Kultur Etxeko obrak direla eta zerri-egina zegoelako plaza ingurua. Goiz batean errepaso ederra eman zitzaion». Auzolanak asko lagundu dezakeela uste dute, baliabide ekonomiko haundia eskatzen ez duten gauzetarako, edo auzotarrek egin ditzazketen lan txikietarako.
Helburu nagusia, auzoa berriz piztea
«Orokorrean auzoko eraikinak eta azpiegitura zahartuak daude, eta bizitza galtzen ari da auzoa, dendarik ez dauka, adibidez... Kontradikzio bat ematen du, ze berez, jende gaztea gero eta gehiago dago, eta umeak ere bai. Horrez gain, espaloiak zuloz josiak daude, urbanizazioan berritu beharreko lekuak daude... diagnosi orokor bat egin beharra dago. Seguru asko, dena ezingo du Auzo Udalak konpondu, baina bertatik hobeto detektatuko ditugu arazo horiek».
Konpetentzia nagusiak zehaztuta daude
Berez, zehaztuta dago Auzo Elkarteak zein konpetentzia izango dituen: Ondarea zaintzeko lan txikiak; kultura; gizarte zerbitzuak; inbertsio txikiak; instituzioekin harremanak; kredituak eskatzeko gaitasuna; eta diru laguntzak eskatzeko gaitasuna. Hernaniko Udalari lotutako entitatea izango da (Patronatu baten gisakoa), eta alde horretatik, azken erabakiak Hernaniko Udalak hartuko dituela diote, auzo elkarteko kideek. Zenbateko aurrekontua izango duen ez dago jakiterik oraindik; zehaztuta dagoena da, formula bat. Horren arabera, Hernaniko Udalaren aurrekontu orokorra segun zenbat den, hainbesteko bat tokatuko zaio Ereñotzuri. Konparazio batera, 2010ean, Ereñotzuri tokatuko zitzaizkion, 287.881 euro inguru (ikus taula).
Bost urteko lana
2005ean hasi zen prozesua, Auzo Udala sortzeko. Lau Plenotan pasa da prozesua, eta denetan aho batez onartu da proposamena. 2010eko martxoaren 8an Ereñotzuk baiezkoa eman zion Auzo Udalari, galdeketa batean. 2010eko urriaren 7an Gipuzkoako Foru Aldundiak Foru dekretua onartu du.
Formula honen bidez erabakiko da, Auzo Udalaren aurrekontua. Beti, Hernaniko Udalaren aurrekontuaren araberakoa izango da (Siadecok egindako kalkulua).
Langile Gastuak %0,7
Ondasun Arruntak, zerbitzuak %1,7
Transferentzia Arruntak %0,5
Inbertsio Errealak %2
Inbertsioetarako fijo bat: 30.000 euro