Ostegun gau berezia izango da gaurkoa Ereñotzun, musika doinuek dardarka jarriko baitute auzoa. Izan ere, kontzertua eskainiko du Belarri Fuckers taldeak, Irrintzi tabernaren terrazan, gaueko 22:00etan hasita. Rock eta heavy metal bertsioak eskainiko ditu Belarri Fuckers taldeak, auzotarren gorputzak eta buruak astintzeko.
Irrintzi tabernak antolatu du kontzertua, Ereñotzuko Auzo Udalaren laguntzarekin. Gainera, jakinarazi du ogitartekoak aukeran izango direla tabernan, plana borobiltzeko: «eskatu zure bokata, bertan afaldu eta gozatu musikaz!», luzatu dute gonbitea.
Aurreko larunbatean, Mungiako San Pedro jaietan eskaini zuen kontzertua Belarri Fuckers taldeak, eta ezaguna da Hernanin ere: Hernaniko Errugbi Elkartearen Garagardo Azokan jo zuen joan den urtean.