Aurtengo uztailean Ereñotzun udalekuak izan daitezen, horiek antolatu eta bideratzeko zerbitzua esleitzeko prozesu irekia abiatu du Auzo Udalak. Apirilaren bukaeran argitaratu zuten deialdia, eta maiatzaren 11ra arte aurkeztu daitezke proposamenak; larunbat honetara arte, alegia.
Bi urterako kontratua izango da, eta beste urtebetez luzatu daiteke. Oinarrizko aurrekontua 14.948,79 eurokoa (gehi %10eko BEZa) izango da urteko.
Proposamenak internet bidez aurkeztu beharko dira, www.contratacion.euskadi.eus plataformaren bitartez. Aurkeztutako proposamenak baloratzeko, honako irizpideak erabiliko dituzte: balio-judiziozko irizpideak (gehienez ere 49 puntu), proiektua eta programa baloratzeko; eta automatikoki baloratuko diren irizpideak (gehienez ere 51 puntu), eskaintza ekonomikoari (0-31 puntu) eta proposatzen den koordinazio eta begirale taldeari (0-20 puntu) dagozkionak. Kontratua eskuratzen duenari, sinatzean ordainduko diote %30a, ekintzaren bukaeran (2024ko uztailaren 31rako) %60a, eta memoria aurkeztean (beranduenez 2024ko irailaren 30erako) %10a.
Honakoak dira programaren helburuak, besteak beste: haurrekin aisialdi hezitzailea eta erakargarria antolatzea; parte hartzeko eta erabakitzeko ahalmena ematea; harreman osasuntsu, juxtu eta asegarriak jostea; askotariko jarduera fisiko eta kirol jarduerak probatzea eta ezagutzea, eta horiekin gozatzea; aniztasuna errespetatzea eta balore gisa lantzea; udalekuak euskeraz garatzea eta euskeraren erabilera soziala indartzea; Ereñotzu bailararen eta bertako eragileen inguruko ezagutza areagotzea...