Xabi San Sebastian musikari donostiarraren ikuskizunaz gozatzeko aukera izango dute ereñotzuarrek, apirilaren 13an. Olak Auzo Elkarteak antolatu du jarduera, eta Ereñotzuko aretoan eskainiko du kontzertua San Sebastianek, arratsaldeko 19:30etan.
Donostiarraren bosgarren diskoko emanaldia izango da; 'Betazalak' lanarena, hain zuzen. Horretarako, ohiko bost laguneko taldea igoko da oholtzara: San Sebastianek jarriko ditu ahotsa eta gitarren doinuak, Karlos Arancegui ariko da baterian, Nando Neira kontrabaxuan eta baxuan, Satxa Soriazu teklatuetan, eta Gari Otamendi biolinarekin eta biolarekin.
San Sebastianek berak zehaztu duenez, 'Betazalak' diskoak jasotzen ditu «tantaz tanta destilatutako hamar kantu berri». Eta folk kantautoreen ildoa jarraituz, «soinu akustiko finez jantzitako letra poetiko-politikoak» landu dituzte Xabi San Sebastianek berak, Harkaitz Canok, Beñat Gaztelumendik eta Iñigo Astizek.