Iazko azaroan jarri zuen martxan Ondarebideak ekimena, Ereñotzuko Olak Auzo Elkarteak, paseoen bitartez auzoko ondarea ezagutzeko. Estreinako saio hartan, azaroaren 26an, Lastaolan eta Fagollagan barrena osatu zuten ibilbidea, eta ikusmina piztu zuen: 40 bat haur eta heldu elkartu ziren.
Hasiera politak hauspotuta, igande honetarako jarri dute bigarren hitzordua, otsailaren 25erako. Oraingoan, Epelen barrena osatuko dute bigarren ondarebidea. Goizeko 11:00etan elkartuko dira Epeletxon, baina Ereñotzutik joango direnentzat, ordu laurden lehenago jarri dute hitzordua auzoan, 10:45etan, ahalik eta ibilgailu gutxienetan bertaratzeko.
Epeletxotik abiatuta, Epele bailaran barrena osatuko dute paseoa, eta hainbat tokitan egingo dituzte geldialdiak, horien berri jasotzeko, bertakoen ahotik: Etxeberrin, Irubiden, Bordan, Epele Torren, Errotan eta Añua Berrin. Ibilaldia bukatzean, gainera, mokadu bat egingo dute, Epeleko aterpean.
Bertaratu eta parte hartzera animatu dituzte auzotar guztiak, «bertako ondarea eta kontuak ezagutzeko, bertako bizilagunen eskutik». Izan ere, horixe da ekimenaren helburua: «Auzoko ondarea paseatuz ezagutzeko ibilbideak dira ondarebideak. Auzotarrak elkartu eta, paseo bat eginez, leku horretako bizilagunek ematen dituzte bertako kontuen eta istorioen azalpenak».
Eguraldi aldakorrari begira dira egunotan ondarebidearen antolatzaileak. Izan ere, eguraldi traketsa egingo balu, atzeratu egingo lukete ekitaldia. Hala izatekotan, hori bai, aldez aurretik abixatuko lukete.