Giro ederra ziurtatuta dago gaur goizerako, Ereñotzun. Dortsal guztiak agortuta eta eguraldia lagun, Ereñotzuko Mendi Lasterketaren 11garren edizioa jokatuko da, 200 partehartzailerekin. Goizeko 10:00etan abiatuko dira korrikalariak, eta ohiko ibilbidea osatuko dute: 11,75 kilometro, 835 metroko desnibel positiboarekin, Aiako Harria parke naturalean barrena. Urdaburuko tontorra izango dute punturik altuena, zazpigarren kilometroan.
Helduak abiatu aurretik, haurren lasterketa ere izango da, 09:30ak aldera. Adin guztietako haur eta gaztetxoek hartu dezakete parte, eta frontoian eman beharko dute izena, doan. Ibilbide gorabeheratsua osatuko dute auzoan barrena.
Lasterketa nagusia amaitzean, azkeneko korrikalaria iritsi ondoren, sari banaketa egingo dute: aurreneko hiru gizonezko eta emakumezkoek izango dute saria, eta baita lehenengo ereñotzuarrek ere. Gainera, makina bat produktu eta sari zozketatuko dituzte.
Eta sari banaketaren ondoren, hamaiketako ederraz gozatzeko aukera izango dute korrikalariek, lasterketan bizitakoak komentatu bitartean: paella eta sagardoa izango dute, indarrak berritzeko.
Lasterketara doazenek, Ereñotzun bertan izango dute aparkatzeko aukera. Horretarako, beheko futbol zelaia egokituko dute aparkaleku gisa, bolatokiaren ondoan. Dortsalak, berriz, Auzo Udaleko aretoan banatuko dituzte, 08:30etatik 09:30etara. Emakumezkoek, frontoiko aldageletan izango dituzte dutxak; eta gizonezkoek, aldiz, Txirrita eskolako aldageletan.
Asteartean agortu ziren Ereñotzuko Mendi Lasterketarako azkeneko dortsalak. 200 partehartzaileetatik, 84 dira Urumea bailarakoak; gehienak hernaniarrak (68) eta ereñotzuarrak (8).