Maiatzeko hauteskundeei begira, aste honetan bertan hasi dira lehenengo mugimenduak Ereñotzun. Aurten ere, Olak Auzo Elkarteak Auzo-Udaleko alkate eta juntakide hautagai-zerrenda bat aurkezteko asmoa du, Ereñotzu Ekinez plataformaren izenarekin.
Horretarako, aurreko aldietako prozesu bera errepikatuko dute: 16 urtetik gorako auzotar bakoitzak nahi dituen bost pertsona proposatu ahal izango ditu, etxean jasotako papeleta beteta. Proposamen horiek igande honetan, martxoaren 12an, jasoko dituzte auzo etxeko areto nagusian; goizeko 09:00etatik eguerdiko 13:00etara. Egun horretan ezin dutenek aukera dute proposamenak auzo udaleko bulegoan uzteko, ostiralera arte.
Izendapen gehien jasotzen dituzten 15 pertsonek hautatuko dituzte alkategaia, lau juntakideak eta zazpi lagunez osatutako lan taldea.