Ereñotzun barrikotea berreskuratu dute pandemiaren eraginez bi urtez bertan behera geratu eta gero. Beraz, urteroko hitzordua itzuli da. Aurten abenduaren 16an izango da, arratsaldeko 20:30etan hasita, Ereñotzuko Ur-Mia elkartean.
Gabonak gainean direla aprobetxatuz, festa giroari helduko diote auzotarrek, mahaiaren bueltan elkartu, eta ondo pasatzeko. Barrikotean parte hartzeko, dena den, aldez aurretik eman behar da izena, Ur-Mian bertan edo 607 703185 telefono zenbakian. Azken eguna abenduaren 13an, asteartean.
Txistorra, bakailua, saiheskia, sagardoa...
Txistorraz gain, bakailua eta saiheskia ere izan ohi dute menuan eta laguntzeko sagardoa. Azken barrikotean, 2019an, 62 lagun bildu ziren eta aurten giro hori berreskuratu nahi dute.